НАРНЫ ХЭТ ЯГААН ТУЯА ГЭЖ ЮУ ВЭ?

Нар нь арьсны хавдар үүсгэгч хоёр төрлийн хорт туяаг ялгаруулдаг. Эдгээрийг нарны хэт ягаан туяа нь альфа (UVA) болон бета (UVB) гэж тэмдэглэдэг. Хэт ягаан туяа нь нарны идэвхжил, агаар мандлын бүтэц, цаг агаарын өөрчлөлт зэрэгтэй холбоотойгоор хүнд нөлөөлөх сөрөг нөлөөлөл нь ихсэж, арьсны хавдраар өвчлөгсдийн тоо жил ирэх тусам нэмэгдэж байна.

Иймээс арьсаа нарнаас хамгаалах хамгийн зөв арга бол зориулалтын тос хэрэглэх. Гэхдээ нарнаас хамгаалах тос хэрэглэснээр таны нүүрний арьс яг цагаан цайвар хэвээр байна гэж ойлгож болохгүй. Энэ нь зөвхөн нарны хэт ягаан туяаг бууруулж, түүний хорыг нүүрний арьсанд нөлөөлөхөөс хамгаална.

UVA, UVB туяа ямар учиртай вэ?

UVA (урт туяа) нь цаг агаар, улирлаас үл хамааран нарнаас байнга ялгарч байдаг туяа. UVA туяа нь шилний цаанаас нэвтлэж, хор учруулах чадвартай. Эдгээр туяаны нөлөө тэр доор нь гардаггүй бөгөөд арьсанд гүн нэвтэрч нарийн үрчлээ үүсэх, аажим аажмаар арьсны хөгшрөлт явагдахад нөлөөлдөг байна. Түүнчлэн арьсанд сэвх, толбо үүсэх гол шалтгаан энэхүү туяанаас болдог юм.

UVB (богино туяа) нь зуны улиралд ялангуяа өдөр идэвхтэй байдаг. Эдгээр туяанд түлэгдсэн арьсны шинж тэмдэг хоёр өдрийн дараа илэрдэг бөгөөд удаан хугацааны турш арилахгүй. UVB арьсыг харлуулж, улайлгаж хорсгоно. Арьсны уян хатан чанарыг алдагдуулж, өнгөн давхар­гыг хордуулж, хар сэвх, толбо үүсгэдэг байна. Түүнчлэн арьсны хорт хавдар үүсэх эрсдэлийг нэмэгдүүлдэг.

SPF ГЭЖ ЮУ ВЭ?

Нарнаас хамгаалах тосон дээр SPF15, SPF20, SPF30, SPF50 гэх зэрэг тэмдэглэгээ байдаг. Энэ нь Sun Protection Factor /SPF/ буюу нарнаас хамгаалах хүчин зүйл юм.

Ихэнх нарны тос нь UVB төрлийн хэт ягаан туяанаас хамгаалах зориулалттай байдаг. Энэ төрлийн тос нь SPF15 буюу түүнээс дээш найрлага бүхий гэсэн шошготой байх бөгөөд арьсыг зөвхөн наранд түлэгдэхээс хамгаална гэсэн үг юм. Харин UVA төрлийн хортой туяанаас хамгаалдаггүй байна. Иймээс нарнаас хамгаалах тос нь түлэгдэлт, үрчлээ болон толбо үүсэхээс нэгэн зэрэг хамгаалах боломжгүй аж.

Нарны гэрэлд ямар ч хамгаалалтгүй гарсан арьс 20 минутын дараа гэхэд л улайж эхэлдэг байна. Иймээс SPF найрлагатай тос хэрэглэх хэрэгтэй.

SPF нарнаас хэдий хугацаагаар хамгаалах вэ?

• SPF15- нарнаас 3-4 цаг хамгаална,
• SPF25- 4-6 цаг хамгаална.
• SPF30- наранд 6-8 цаг байхад айлтгүй.
• SPF50-нарнаас 9-11 цаг хамгаална.

SPF нарнаас хэдэн хувь хамгаалах вэ?

• SPF15 нь UVB туяанаас 93 хувь.
• SPF20 болон SPF30 нарны хорт туяанаас 97 хувь.
• SPF50 нь 99 хувь хамгаална.

  PA UVA（Protection Grade of UVA）Нарны хэт ягаан туяа А туяанаас хамгаалах тэмдэглэгээ бөгөөд + тэмдэг нь олон байх тусам үр дүн сайтай. ＋＋＋＋、＋＋＋、＋＋、＋ гэсэн 4н үе шаттай.

1. PA+ Бага зэргийн хамгаалалт (some UVA protection) ⁣
2. PA++ Дунд зэргийн хамгаалалт (Moderate UVA protection) ⁣
3. PA+++ Өндөр хамгаалалт (High UVA protection) ⁣
4. PA++++ Маш өндөр хамгаалалт (Extremely high UVA protection)

      Иймд зуны нартай өдөр SPF 50 ба UVA/PA++++ хамгаалалттай тосыг түрхсэнээр арьсаа нарны хэт ягаан туяанаас хамгаалж, нөсөө толбо үүсэх, борлох, арьс жигд бус өнгөтэй болох, үрчлээ үүсэх зэргээс хамгаалж чадах юм.